على صوتك
الاعلامى: هو شخص لازم يبقى عارف حاجة عن كل حاجة ...لكن فى مصر الاعلامى ممكن يبقى عارف ولا حاجة عن اى حاجة فيلجأ للفتى (الحل السريع لاى سؤال مش عارف اجابته )
و فى كلية اعلام و استنادا لمبدأ انك لازم تبقى مثقف ممكن جدا يطلب منك اى حاجة تتخيلها حتى لو فى وجهة نظرك هى ملهاش لازمة بس علشان الدرجات و اعمال السنة و اللذى منه انت مجبر انك تعملها .
و فى قسم صحافة بعانى جدا من الموضوع دة خصوصا فى مادة اسمها تكنولوجيا الاذاعة و التليفزيون.
طلب منى انى اعمل بحث عن احد مكونات الاستوديو الاذاعى و لانى مش بحب المادة دى فأخترت الميكروفونات و قلت اعمل نفسى ناصحة اصل دى اكيد اسهل حاجة لكن من الواضح انى كان جوايا دافع اقوى من النصاحة خلانى اختار الميكروفونات و هى انى رغاية و فى الاذاعة ايه الوسيلة اللى بتنقل الرغى و الكلام ؟؟؟
برافووووووو الميكروفون
فى بحثى عن الميكروفونات و انواعها اكتشفت ان فى اكثر من 6 او 7 انواع و كلهم حساسين جدا للصوت يعنى لو رمشت الصوت ممكن يتنقل .
اللى لفت نظرى فى البحث انه برغم وجود انواع كتير كدة من الميكروفونات و برغم ان فيه محطات اذاعية كتير ملهاش شغلانة غير الرغى فى ودان المستمعين الا ان فيه ناس كتير اوى صوتها مش واصل .
يا اما للمسؤلين او للناس اللى حواليها او لنفسها !!
اه لنفسها ما هو لما متبقاش عارف انت عايز اية ؟؟ و لا حتى عارف نفسىك انت مين بتحب اية بتكره اية بتعمل الحاجات دى ليه ؟؟ و متبقاش عارف تسمع كلام الناس و لا تعمل اللى مقتنع بيه؟؟ يبقى صوتك لسه مش واصلك و محتاج ميكروفون عند عقلك عشان تسمع صوتك كويس .
الميكروفون مش بس اداه بنستخدمها فى الاذاعة او التليفزيون و خلاص لأ ده رمز جوه كل واحد مننا .
رمز انك انسان ناضج بتعرف تفكر بعقلك اللى سامع صوته كويس و اللى بتعمل اللى بيقولك عليه و انك متحمل مسؤلية انك ممكن تسمع صوت عقلك غلط لوجود عطل فى الميكروفون بس متقفش عند الغلط لأ صلح العطل ده و متخليش ميكروفونك يبوظ تانى .
الميكروفون رمز الحرية و القدرة على التعبير عن راى بدون خوف و بدون ما حد يجى يقفله و انا بتكلم .
لو عايز مصر تبقى بلد فيها ديموقراطية يبقى لازم تبتدى بنفسك و تسمع ميكروفونك كويس .
أقرار :
اقر انا ......(اكتب اسمك) انى من النهاردة هكون ميكروفون لاى حد صوته مش طالع ،لاى حد نفسه يصرخ و مش عارف ،لاى حد عايز يرغى و يتكلم . من النهاردة الميكروفون مش همسكه بس عشان اقعد اغنى لأ ده انا هحطه جنب عقلى و قلبى عشان اسمعنى كويس .
من النهاردة جيب ميكروفون و اسمع اغنية على صوتك لمحمد منير :)
http://www.youtube.com/watch?v=sv743sd0F78
