بالألوان الباهتة

"الرجل  الناجح و المشرق ورائه امرأه عظيمة اما المرأه الباهته ورائها رجل احمق"
عمرك حسيت انك باهت ؟؟ ملكش لون ؟؟
شايف كل حاجة بنفس اللون !!
مش عارف انت فرحان و لا مضايق ؟؟ فيه حاجة غلط فيك بس مش عارف هى ايه ؟؟
لما حد بيسألك عامل اية ؟ بتقوله كويس بس انت من جواك عارف انك مش كويس و مش عارف تبقى كويس لانك اصلا مش عارف فيك ايه...
بقالى فترة حاسة انى باهتة ولا انا مبسوطة و لا عارفة ابقى مبسوطة بضحك و  بهزر و بعمل اللى عايزاه بس مش من جوايا .
مضايقة بس مش عارفة احدد من اية ؟؟
انا كتبت قبل كدة جرعة مكثفة و قلت انى محتاجة جرعة سعادة مكثفة المرة دى انا محتاجة جرعة مكثفة و عاجلة جدا .
افكارى مشوشة جدا لدرجة انى بقيت بكتب بالعافية .
لما ببقى مبسوطة ببقى نفسى الون كل حاجة ازرق حتى البنى ادميين .
غريب اوى اللون ده علماء النفس بيقولوا عليه انه لون مريح جدا للعين و يوحى بالسلام و الهدوء و الراحة .
 تخيلوا كده لو الدنيا كلها لون ازرق اكيد كانت اعصاب الناس هتبقى هادية مش هيبقى فيه خناقات و لا مشاكل كانت هتبقى حياتنا شكل تانى خالص.
اخر مرة كنت مبسوطة بجد كلمت حد من صحابى قولتوا ممكن تبقى مبسوط؟؟ اصل انا مبسوطة اوى مش عارفة ليه و عايزة اشوف كل الناس بتضحك...كنت عايزة وقتها اوقف الزمن عشان الانبساط ده ميروحش بس كأنى كنت قافلة ايدى على شوية هواء عشان احافظ عليهم .
فى لحظات كدة الواحد بيتمنى يوقف فيها الزمن او يرجع تانى بس للأسف كل حاجة فى حياتنا ممكن ترجع الا الزمن .
عارف احساس لما تفضل تحكى و تفضفض بس لسه فيه حاجة جواك رافضة تتطلع حاجة مش عارف هى ايه؟ و لا ليه رافضة تتطلع؟
 من فترة لقيت عندى تي شيرت كان ابيض بهت عليه لون تانى مبقاش باين لونه ايه ؟ قررت البسه  مع انى مكنتش بحبه بس حسيت اننا شبه بعض اوى.
فجأة و انا بكتب الموضوع ده قررت انى:
* هدور على حاجة جديدة اعملها .
*هسمع اخبار حلوة.
*لما حد يسألنى عاملة اية ؟ هرد هبقى كويسة.
*هسمع اكتر اغنية بحبها و هغنى معاها بصوت عالى اوى .
*مش هستنى من حد اى حاجة لان ده سبب اساسى فى البهتان.
لو انت كمان بهتان اعمل كدة ادى لحياتك لون J لونها بأى لون بتحبه حتى لو اسود المهم انت تبقى مبسوط .

ملحوظة:القول اللى فوق لا ينطبق على المرأه فقط لكن على اى حد حاسس انه باهت انت وراك حد احمق مش عارف قيمتك.

اشمعنى الفيل؟؟

القربين منى يعرفون جيدا حبى للفيل و هوسى بهذا الحيوان الضخم اللى تقريبا مفيش حد بيحبه غيرى و لان كتير اوى بيسألونى اشمعنى الفيل يعنى اللى بتحبيه ؟؟ قررت انى اكتب ايه هو سر حبى للفيل .

عشقى للفيل مش جنان منى و لا حاجة او مثلا لانى مش لاقيه حيوان احبه رحت قلت احب الفيل (فراغ يعنى) لاء ده حاجة مبنية على اسس علمية و نفسية عميقة (مش اوى يعنى).

اشمعنى الفيل :

1-"هل تعلم ان الفيل عندما يحزن يبكى" اول مرة قرأت المعلومة دى كانت من زمان اوى استغربت جدا ان الحيوانات بتعيط اصلا انا اعرف انها بتفرح و بتزعل بس عمرى ما فكرت ان ممكن حيوان يعيط !!! بعد ما قرأتها قعدت افكر طيب هو ازاى السمك بيعيط فى البحر ؟؟ بعد كدة اكتشفت ان الفيل هو الحيوان الوحيد اللى بيعمل كدة و يمكن لان انا عندى عقدة نقص فى موضوع العياط ده يعنى مش بيعيط غير لما ابقى على اخرى فحسيت ان الفيل عايش مرتاح انه كل ما يزعل يعيط  بيعرف يعبر عن مشاعره و دى كانت اول حاجة خلتنى احبه .

2-تعرف ان برغم حجم الفيل الضخم و وزنه الثقيل ان الفيل بيتغذى على الخضرة يعنى ولا بيأكل لحمة زى الاسد و لا موز و سودانى زى القرد يعنى اكتر حيوان بيأكل اكل صحى مع ان اللى يشوفوا يقول ده بيأكل بنى ادميين! و ده خلانى افكر ان كتير اوى بشوف الناس من بره و احكم عليهم من وجهة نظرى من غير حتى ما افكر هما كدة ليه و ازاى ؟؟ لكن الفيل علمنى ان قبل ما احكم على اى حد لازم ابقى عارفاه كويس و عارفة ظروفه لان فيه حاجات كتير اوى مش كل الناس تعرفها .

 3-الفيل حيوان صبور و لطيف جدا و عشان كده هو من اكثر الحيوانات سهله التدريب بعد الكلب طبعا و لأنى شخصية مرنة الى حد كبير فالمعلومة دى خلتنى احس ان الفيل شبهى لانه بيعرف يتكيف مع اى ظروف.

4-المعلومة القنبلة : عارفين بقول عليها قنبلة ليه لأنها خلتنى مش بس احب الفيل لاء ده انا بقيت بحترمه جدا كمان المعلومة بتقول: ان الفيل الكهل (العجوز يعنى) لما بيحس ان نهايته قربت ينعزل عن بقية القطيع و يذهب لمكان اسمه مقبرة الافيال و هو مكان كئيب و موحش جدا و يذهب اليه الكهول و المرضى اللذين يشعرون بأقتراب الموت منهم فقط و لا يقترب اليه الشباب و يفعل الفيل هذا حتى لا يحمل افراد عائلته مشقة حمله و دفنه بعد موته فهو عندما يذهب الى هذا المكان يجلس هناك حتى يموت. يااااااااه شوفوا قد ايه بيحس و مش عايز يتعب حد معاه كم انت عظيم ايها الفيل !!
 على فكرة مش شرط كل اللى يقرأ الموضوع يقتنع بيه و يحب الفيل زى كده. يمكن اكون مجنونة انى بحب حيوان زى ده بس لو هو ده الجنان انا عايزة افضل كدة على طول.بس حتى لو محبتش الفيل كفاية انك تتعلم منه حاجة زى ما بنتعلم الوفاء من الكلب .
  ملحوظة: حبى للفيل جعلنى افكر جديا فى شراء واحد صغير بس المشكله هربيه فين؟؟؟اللى يلاقى فيل صغير و مكان مناسب بسعر حلو يقولى بقى .

قصة بلا نهاية

 ادركت مؤخرا ان الحياة بدونه لن تكون حياة ،فهمت فجأة لماذا يتمنى بعض الناس الموت بعد الوقوع فى حفرة فقدان الامل و اليأس و لكن حتى الموت لا يريد ان يتحقق لهم. فقد اصبح الموت عندها امنية صعبة المنال.بعد قرار الانفصال الذى اتخذوه فى المكان الذى شهد ميلاد حبهما، عادت الى منزلها دخلت غرفتها و ذهبت للركن الذى تحبه فيها جلست على الارض و اتخذت وضع الجنين الذى يريحها كثيرا حاولت ان تبكى فجفت دموعها  حاولت ان تصرخ فأبى صوتها ان يطيعها. لم تكن هذه المرة الاولى التى تحب فقد احبت فى طفولتها صديقها فى الحضانة ،و احبت ابن الجيران فى مراهقتها ،و فارقت كل هؤلاء ،و لكن هذه المرة  ليست كمثل اى مرة هذه المرة الاولى التى عرفت  فيها العشق، عرفت معنى القلب الواحد و العقل الواحد فى جسدين ، هذه  المرة الاولى ايضا التى تتذوق فيها المعنى المر لأكثر كلمة تكرها وهى الفراق. اخذت تفكر فى علاقتهما كم كانت جميلة كم احبت ان تستمر و ان تنتهى النهاية السعيدة بالزواج مثل الافلام التى كانت تشاهدها و لكن الحياة ليست فيلم و لا خيال انها الواقع المرير الذى ابشع من الخيال ،حاولت ان تعتدل عن وضع الجنين و لكن جسدها كله رفع اعلام العصيان لها و كأنه بذلك يسجل اعتراضه على هذه الحياة.........
استيقظت من شعاع الضوء الذى تسرب من خلف الستائر لتجده ذهب الى عمله كالمعتاد و تركها وحيدة ركزت لكى تعرف ما تاريخ اليوم فأكتشفت انه قد مر 7 سنوات منذ جلوسها فى اركان غرفتها بوضع الجنين ابتسمت بحسرة على حالها وتذكرت جملة كانت تحبها فى مسلسل كورى تقول(الحب الاول لا ينسى ابدا) و قد ادركت اليوم انها لم تقدر ان تنسى حبها الاول و حتى بعد زواجها من رجل اخر. فكيف تنساه و هو الذى عرفت معنى الحياة معه ،كيف تنساه و هو الذى اذاقها الموت و هى حية ،لقد حاولت مرارا و تكرارا و لكنها لم تستطع لم تكن 7 سنوات كافية لنسيان الحياة و الموت،  لنسيان قلبها الذى مات بداخلها......
زوجها الحالى رجل فاضل لم ترى منه اى شر حتى عندما كان يسمعها تغمغم فى نومها بأسم حبيبها السابق لم يرد يوما ان يجرح مشاعرها و يواجها بهذا الامر فظل محتفظ به سرا. اراد احيانا ان يحتضنها ليشعر بها و لكن برودتها جعلته يفكر فى الامر الف مرة قبل ان يفعله. حاولت هى ايضا ان تحبه و لكن كيف و قلبها مات منذ 7 سنوات.....
لم تنته القصة بعد فهى مستمرة بداخلنا جميعا فليضع كل واحد النهاية التى يريدها ،فالامور التى فى حياتنا يمكن ان تبدأ بغير ارادتنا و لكن بأرادتنا نضع النهايات مهما كانت .   

عم سيد

عمرك حسيت انك عايز تعيط على مصر و على اللى حصل فيها عمرك حسيت بالحسرة على الشباب اللى زى الفل بس للاسف مش لاقى شغل وقاعد على القهوة. عمرك حسيت لمرة واحدة ان العيب فينا مش فى البلد اننا اللى مش عارفين نشغلها ونستغل خيرها صح ؟ يمكن تكون لسه مفهمتش قصدى او فاهم بس عمرك ماحسيت الاحساس ده لكن انا  بقى جربت الاحساس دة على فكرة دى مش وطنية زيادة منى ولا حاجة لما بقول انا فعلا حسيت كده لاء دى بس مجرد حكاية بسيطة حسستنى بكل ده . الاحساس ده بدأ لما ماما قالت ان يوم الاتنين الجاى جاى سيد عشان ينضف الشقة ودى كانت اول مره يجيى فيها سيد عندنا قلتلها يا ماما بس ده راجل هينضف حلو دة ؟ قاليتلى ادينا هنشوف هنجربه ولو عجبنا هيستمر معانا معجبناش يبقى خلاص  ولما سألت عن عمره قاليتلى ان خالتها هى اللى جايباه وبتقول شاب. فضلت لغاية يوم الاتنين مش بيدور فى بالى غير سؤال واحد اية اللى يخلى شاب صغير يشتغل كدة ينضف بيوت انا طبعا مش بقلل من المهنة دى وكويس انه بيشتغل حاجة شريفة وكويس انه بيشتغل اصلا بس بردة دة شاب يشتغل كدة . يعنى ليه مشتغلش عامل ؟ او لو متعلم ليه مشتغلش حاجة بشهادته ؟ اسئلة كتير بس ملهاش اجابة غير عند سيد. استنينا يوم الاتنين بس سيد مجاش وقال انه عنده ظروف مش هيقدر يجيى وهيجيى يوم الخميس الجاى ودارت الاسئلة تانى فى بالى بس المرة دى قررت انى هسألة كل الاسئلة دى بس طبعا بطريقة لطيفة من غير ما اضايقة. يوم الخميس جه و صحيت على صوت سيد خرجت من الاوضة وانا عمالة اتخيل فى شكل الشاب سيد بس اتصدمت بصراحة اصلى لقيت سيد او عم سيد عنده 50 سنه كنت متوقعة انى هلاقيه يائس وناقم على شغلته بس لقيته راجل بصراحة زى السكر على طول بيضحك وبيعمل شغلته بضمير اوى . عم سيد عنده خمس عيال اكبر عيل 18 سنه واخر العنقود عنده 4 سنين ونص بصراحة كنت واقفة قدام  الراجل ده مستغربة راجل كبير فى السن وبيشتغل كدة وكمان راضى عن شغلته اوى وبيقول انه بيشتغلها من زمان وميعرفش يشتغل حاجة غير ها مقدرتش اسأله و لا سؤال من اللى كانوا فى بالى مقدرتش اقوله غير ميرسى يا عم سيد اصله رجع شقتنا نضيفة وزى الفل تانى . انا فى الاول كنت مضايقة على شباب مصر ومنهم سيد اللى بينضف بيوت بس لما طلع سيد عم سيد وراضى على شغلته فرحت ان فى حد فى الزمن ده راضى بحالة.

 

لم تكن تعرف انها ستشتاق اليه الى هذا الحد،لم تعرف كيف اطاعها قلبها عندما قررت البعد عنه. تشعر و كأن النار التى فى داخلها سوف تحرق كل من يقترب منها ..اما هو فلم يكن يعرف ماذا حدث لها فهى ليست كعادتها يشعر و كأن نهر الحب الذى فى داخلها جف فجأه. اصبحت ردودها  قاسية جدا عليه. يريد يتصل بها كعادته و لكنه خائف من الصواعق التى اصبحت تخرج من فمها تدور فى بالها اغنية اليسا "من كتر حبى فيك انا قربت اكرهك" غريبة هذه الحياة احيانا نحب اشخاصا الى درجة الكره و نكره اشخاصا الى درجة الموت.

سنة فى تاريخ البشرية

اخذت تلملم بقاياها فهذا يوم حزين لم ترغب ان تعيشه و هذا يوم سعيد تمنت لو كان 48 ساعة و ليس 24 فقط .فى توديعها انقسم الجميع الى ثلاثة اجزاء ..،.جزء كان ينعتها بأسوأ الالفاظ و كان يتهمها بانها (وش الفقر عليه)،و جزء ثانى كان يشكرها انها اخيرا جاءت و حققت له احلامه التى طالما حلم بها ،اما الجزء الاخير فكانت لا تساوى عنده شىء فهى مثل التى سبقوها. هى عنده مجرد سنة اضيفت الى عمره  و زادته  شيبا و عجزا غصب عنه. قبل ان تتولى مهمتها كسنة فى تاريخ البشرية لم تكن تعرف لماذا تكره السنين و ظيفتها، لم تكن تعرف معنى ان الكره قد يؤدى الى القتل، فبكره الناس لها و الدعوى عليها كل يوم و الرغبة فى ان تنتهى بأى شكل من الأشكال كان البشر يقتلوها. حاولت ان تُفهمهم ان القدر هو المُتحكم فى ايامهم و ليس هى و لكن لا حياة لمن تنادي، ظل الكل يكرهها و مُؤمن انها سبب كل المصائب .

فى طريقها للرحيل شاهدت 2011 تمشى بهمة فى طرقات تاريخ البشرية الكل يهنئها بتوليها هذا المنصب اخيرا و هى تضحك متوقعه ان كلام البشر عليها و استبشارهم فيها خير  سوف يدوم. ابتسمت ابتسامة ساخرة حزينة تذكرت نفسها فى هذا الوقت عندما كانت سنة 2009 هى صاحبة المهمة، كانت تمشى فى الطرقات بأستكبار فطالما انتظرت هذا المنصب لتثبت فيه جدارتها و لتثبت للبشر انها سوف تكون افضل سنة عاشوها فى حياتهم و لكنها اكتشفت بعد توليها المنصب انها كانت تعيش فى اوهام و ان الرياح تأتى بما لا تشتهى السفن و انه لا يمكن لسنة ان يَرضى عنها كل البشر، و كيف يرضى عنها كل البشر ففى السنة التى تزوج فيها (فلان) (بفلانة) التى ظل يحبها 10 سنوات.ماتت ام (فلان) و التى احس بعدها ان حياته بلا قيمة دون امه فأنتحر، و فى نفس العام رزقت (فلانه) بأول طفل لها و اصبحت سنة 2010 هى السنة الملازمة له فى تاريخ عيد ميلاده ،خصخصة شركة (فلان) و طرده مالك الشركة الجديد و اصبح عاطلاً بلا عمل .....ظلت تتذكر كل هذه الاحداث وغيرها الكثير و تمنت ان يفقد جميع الذين احزنتهم ذاكرتهم لينسوها و ان يظل كل الذين فرحوا فيها يتذكروها بانها كانت أسعد سنة عليهم .

ملحوظة :كتبت فى 31/12/2010 قبل انفجار القنبلة فى كنيسة القديسين.

خيالات الرحيل

لا اعرف من اين ابدا وكيف انظم الكلام وارتبة ليصبح صحيحا ولكنى سأكتب رغم كل شىء. ركبت معه السيارة جلست بجانبة فقط كنت معه بمفردى و فجاة وجدت الحياه بدونه شعرت ببرودة تسرى فى جسدى اصبحت ضعيفة وبلا حماية منهارة من الالم الكل يربت على كتفى ويقول لى (بقى فى مكان احسن –ارتاح اصله كان تعبان اوى وكلام من هذا القيبل)اريد ان اصرخ فلا اعرف اريد ان ابكى بشدة فلا اقدر انظر حولى فلا اجد احدا ممن اريدهم بجانبى الان اشعر وكان ظهرى قد تكسر احاول ان اظهر متماسكة فلا اقدر تدور احداث مهمة فى حياتى امام عينى احاول ان اتصورها بدونه و لكنى لم اعرف لم اشعر بطعمها الا اذا كان موجودا بها . فقد  مات والدى اليوم لقد فقدت حمايتى وامانى وظهرى ،اشعر وكأنى عارية فكل رجال العالم لا يعوضون مكان ابى اجلس صامتة واجد عينى تغلبها الدموع رغم محاولات كبتى لها.فجأه اسمع صوته ديانا انتى نمتى ولا اية يلا وصلنا انتفض وانظر فاجده مازال بجانبى واننا لاذلنا فى السيارة ابتسم واقول الحمد لله.     

جرعة مكثفة

ارجووووووووووك محتاجة الجرعة صدقنى هموت مش هقدر اعيش من غير ما اخذها طيب اهدى ازاى و انا تعبانة دة انا كل حتة فيا وجعانى،اية ؟ النوع ده صعب الاقيه امال الناس عايشة ازاى ؟بيمارسوا حياتهم اليومية ازاى ؟؟ هقولك اسم الصنف تانى بس اكتب عندك بقى محتاجة جرعة تشجيع,ايجابية,امل,حب,سعادة,اهتمام,حنان ,محتاجة جرعة مكثفة من كل الحاجات دى. محتاجة حد يحسسنى بالدفا و ان الدنيا لسه بخير و ان بكره اكيد هيبقى احلى. محتاجة حد يحتوينى و يخدنى فى حضنه و يدوس عليا اوى اوى لحد مبقاش قادرة اتنفس من كتر الحضن و يسبنى بالراحة عشان محسش بالبرد فجأة. محتاجة حد يضربنى قلم يدوخنى عشان اقدر اعيط و الدموع ترضى تنزل من عينى.
لما بعيط برتاح حتى لو المشكلة متحلتش بس الدموع بتشيل الحزن و بتخلى العقل جاهز للتفكير فى حل للمشكلة .
احيانا بفكر ان ليه ربنا مخلقش فينا اسمه زرار للبكاء اول ما احب ابكى ادوس عليه و الحنفية تتفتح و لما المية تقطع هكون كدة ارتحت اعتقد كانت الحياة هتبقى اسهل بكتير.
حاجة غريبة اوى بتحصل الواحد يكون بيموت من جوه لكن يقابل الناس بوش بيضحك و لما يقعد مع ناس بيحبهم بيبقى مقضيها هزار و ضحك برغم انه من جواه بيبقى بيموت تقريبا احنا اتعودنا نكدب على نفسنا وعلى اللى حوالينا و الكارثة اننا بنصدق الكدبة دى و بنعيش فيها على انها حقيقة .
المشكلة ان المشاعر و الاحاسيس حاجة مينفعش تتطلب و لو طلبت بترخص اوى.
سبحان الله ربنا ادنا الفلوس لكن برغم كدة خلى اغلى حاجة فينا مينفعش نشتريها بالفلوس دى و هى عواطفنا يمكن لو كان ينفع نشتريها كنا اشترينا قلب صناعى يحب ربنا كأننا بنضحك عليه يعنى .
كلمة الاحتياج كلمة صعبة لكنها الدليل الوحيد ان الواحد عايش و قلبه لسه بينبض و محتاج للناس .

و مازال جارى البحث عن هذه الاصناف. 

بالعكس

كل حاجة فى حياتنا ماشية بالعكس ..
عايشين و جوانا ميت..
بنبكى و احنا فرحانين و وقت البكا تهرب منا الدموع ..
بنهمس لما نحب و نصرخ لما نكره ..
بنحب اللى سيبنا و نسيب اللى يتمنى كلمة..
كل حاجة فى حياتنا ليها وقت ماعدا ربنا ..
العكس مش لازم يبقى غلط بس غالبا بيبقى مش منطقى ..