حاجة تكسف فعلا

انا عاجزة  مقيدة مش قادرة اعمل حاجة ،كل الناس حواليا بتهدنى ده مش لأنى فاشلة  او بطلب التغيير اللى مستحيل فى البلد دى لأ دة لأنى بنت اصل كلمة بنت فى الزمن دة كأنى عاملة حاجة وحشة تكسف صاحبتها!!! 

لما حد يقولى اعملى كذا و اقوله مينفعش اصل انا بنت ببقى مضايقة اوى وانا بقولها و بتمنى الارض ساعتها تنشق و تبلعنى ما هو فعلا فى حاجات كتير مينفعش اعملها عشان انا بنت....او الناس هى اللى اوهمتنى انى مينفعش اعملها عشان انا بنت !!
من كام يوم و انا ماشية فى الشارع واحد عاكسنى بس بطريقة زيادة شوية و جرى رحت قلتلة انت قليل الادب وبعديها اعدت اعيط فى الشارع من الخوف اللى كان جوايا كان نفسى اجرى وراه و امسكه اضربة بس مينفعش ما انا بنت، الناس ساعتها مش هتقول بصوا الولد اللى مش متربى عمل فيها اية لأ دول هيقولوا بصوا قلة ادبها هى اللى اديتوا الفرصة مش تتعاكس و تتكسف من نفسها و من لبسها (مع العلم انى لبسى ممكن ميكونش فيه اى حاجة ملفتة) و تسكت لأ دى كمان بترد عليه و بتعلى صوتها فى الشارع .

حتى ابسط حقوقى و هى انى ادافع عن نفسى معرفتش اعمله دة غير حاجات كتير اوى "فعلا حاجة تكسف".

الرجالة بقوا فاكرين البلد بتاعتهم مبقاش فى اى احترام لينا.

الولد اللى بيعاكس دة لو كان اول بنت عاكسها فى حياته هزأته ولا ضربتة او حتى شتمتة و لا عملت اى حاجة فيه كان بطل معاكسة لكن لانه عارف اننا مش هنعرف نعمل كدة بقى ماشى يعمل اللى هو عايزه و لا بيهمه.

الولد بيعاكس بس لاننا بنات يعنى مش مهم عنده احنا لابسين ايه او شكلنا اية.

الولد بيدى نفسه الحق انه يعمل اى حاجة فى البنت اللى ماشية فى الشارع لمجرد انه فاكر انها بتتبسط من كدة او ان هى بلبسها و طريقتها (على فكرة هو الوحيد اللى بيكون شايفهم مش كويسين) اجبروا انه يعمل كدة فيها .
و لا الموضة الجديدة بتاعت اصلها مش محجبة طيب على فكرة بقى انا مرة شفت واحدة منقبة ولد عاكسها يعنى دة برضة مش مبرر .
نفسى اقول لكل ولد بيضايق بنت فى الشارع مش هقولك اعتبرها اختك و لا مامتك او مراتك عشان قلنا كدة كتير و مفيش فايدة بس هقولك افتكر لمرة واحدة انك راجل و اتصرف زى الرجالة المحترمين و بلاش هيافة ارجوك
 الكلمة و لا النظرة و لا اللمسة اللى بتعملها لبنت ماشية فى الشارع مش هتفرق معاك لو بطلت تعملها لكن هتخلينا نحس بالامان انت مش متخيل الخوف حتى من المشى فى الشارع صعب و قاسى ازاى.

و لكل بنت بتتعاكس و بتتجرح من كلام و نظرة الولاد ليها انتى مش غلطانة انتى صح  انتى قوية  اوعى تحطى نفسك جوه صندوق لمجرد انك خايفة لا اصرخى و قولى لأ بعلو صوتك لاى حد يضايقك و فاكرك ضعيفة و افتكرى دايما انتى مش حاجة تكسف .

 ملحوظة يمكن متهمش حد :تمت كتابة هذا الموضوع من حوالى سنة او يمكن اقل و اضيفت عليه بعض التعديلات من يومين:)